Hestoria
La Banda Gaites Llariegu foi entamada nel añu 1996 por delles presones pertenecientes a estremaes escueles de música tradicional de la fastera centru d’Asturies, por mor d’esparder el patrimoniu musical asturianu.
Dende l’aniciu fasta güei, l’ensame pasó per estremaes etapes fasta consolidase como una de les meyores bandes dientro’l panorama musical asturianu.
Llariegu escomencipia’l so camín el díi 15 d’Agostu de 1996 en Faro (Uviéu). Taba axeitada por 15 presones ente gaiteros y percusionistes. N’esta dómina emplegáronse gaites asturianes en Do y tambores tradicionales asturianos, el repertoriu yera tradicional asturianu y taba axeitáu por pieces d’interpretación cenciella.
Nel añu 1997 la banda entama a xorrecer tanto na composición musical como na so cadarma. Van amestándose nuevos muérganos que dempués d’un asinamientu fonderu pasen a formar parte l’ensame. Camúdense tamién los tambores tradicionales por caxes de media tensión que más alantre pasarán a ser d’alta tensión.
Anguañu la Banda Gaites Llariegu ta entamada por 18 muérganos, magar que dende’l so aniciu pasaron pela formación más de 40 músicos.
La banda ta dirixida por Pablo Pérez, mayestru de la escuela Aula de Música Tradicional Llariegu, y por Arsenio Ruiz, a cargu de la seición de percusión y tamién profesor na mesma escuela.
La Banda Gaites Llariegu non solo nun cuenta con temes tradicionales asturianos, sinon que tamién abarca temes de composición propio asina como de la música tradicional escocesa, bretona, gallega y irllandesa. Na estalla la indumentaria intenta conservase un tastu tradicional pero siempre dientro d’una uniformidá.
Ente les actuaciones más importantes fuera d’Asturies pueden destacase: El Festival Internacional de Corrópoli n’Italia; la xira per St. Nazaire, na Bretaña; el 1er Festival Intercélticu de Bruseles, en Bélxica; la 2ª fase la XI Liga Galega de Bandas de Gaitas, en Galicia; el Festival de la Danse Bretonne de Guingamp, na Bretaña; y el Festival Interceltique du Lorient en 2002, 2010 y 2013 na Bretaña.
Dientro d’Asturies participó en estremaes fiestes y eventos de gran importancia ente los que destaquen: La Feria la Ascensión d’Uviéu, el Festival de la Sidra de Nava, el Díi d’América n’Asturies, los Premios Príncipe d’Asturies, el Festival Intercélticu la Comarca la Sidra, el Festival Folclóricu Internacional de Xixón, el Festival de Bandes de Gaites de Candás, la Fiesta Los Humanitarios de San Martín en Morea d’Ayer, la Nueite Celta de Xedré y el Festival Intercélticu d’Avilés.
Nel añu 2001 la Banda Gaites Llariegu proclámase Campeona d’Asturies de Bandes de Gaites algamando tamién el premiu al Meyor Estilu.
Nel añu 2002 vuelve a proclamase Campeona d’Asturies de Bandes de Gaites, algamando n’esta vegada’l premiu a la Meyor Seición de Percusión.
Nel añu 2003 proclámase Subcampeona d’Asturies de Bandes de Gaites, algamando per segunda vegada’l premiu a la Meyor Seición de Percusión.
Nel añu 2010 proclámase campeona del Troféu Internacional Guinness de Percusión del Festival Intercélticu de Lorient, cola Banda Gaites Noega.
N’avientu de 2011, la Banda Gaites Llariegu espubliza el so primer discu en formatu CD y DVD “Llariegu 100% Directo“, grabáu en direutu nel Teatru La Laboral de Xixón el 27 d’abril de 2011.
Aula de Música Tradicional Llariegu
L’Aula de música tradicional Llariegu lleva trabayando dende 1997 nel conceyu de Sariegu col envís d’esparder y caltener el patrimoniu musical asturianu. Magar de que la so fastera d’influencia incluye los conceyos de Siero, Noreña y Uviéu, la so sede ta asitiada’n Vega, Sariegu.
Les clases entamen nel mes de Setiembre y terminen en Xunetu, con un total de 11 meses de clases y un mes de vacaciones n’agostu.
Los instrumentos usaos na Escuela son de la Banda Gaites, poro los alumnos nun necesiten instrumentos pa dir a les clases.
En función del númberu d’alumnos, nel Aula impártense clases de les siguientes asignatures:
- Gaita Asturiana
- Tambor Tradicional
- Percusión
- Llinguaxe Musical
- Folclor Asturianu
Pa más información ponese’n contautu cola Banda Gaites al traviés de los sos datos de contautu.
Premios
Temporada 2012
- Premiu AMAS al meyor Direutu por “Llariegu 100% Directo”
- Premiu AMAS al meyor Discu Folk por “Llariegu 100% Directo”
Temporada 2010
- Festival Intercélticu de Lorient: 1er Puestu en Troféu Internacional Guinness de Percusión (con Banda Gaites Noega)
Temporada 2003
- III Campeonatu Nacional de BG Asturianes (caberu campeonatu entamáu): Subcampeona d’Asturies
- III Campeonatu Nacional de BG Asturianes (caberu campeonatu entamáu): Meyor Seición de Percusión
- Asociación Amigos del Paisaje de Villaviciosa Cubera: Premiu a la Defensa del Folclore
Temporada 2002
- II Campeonatu Nacional de BG Asturianes: Meyor Banda d’Asturies
- II Campeonatu Nacional de BG Asturianes: Meyor Seición de Percusión
Temporada 2001
- I Campeonatu Nacional de BG Asturianes: Meyor Banda d’Asturies
- I Campeonatu Nacional de BG Asturianes: Meyor Estética
Banda Gaites Llariegu 